اذا رايد تبــــــــــــــــــوك البيت اخذ كلشي التريدة وخلي صينيتي
ادري الكون يفتر واليروح يعود وجف الباكني يصدف عليه زيتي
واذا كلشي انفقد لا تعتقد مفقود لان تبقى وتعيش وياي تربيتي
عاين عالتعب تلكى علي مطبوع عربي وفوك وجهي رسوم عربيتي
عراقي ومقتدي بحيدر علي الكرار وتهزني بساعة الشدة عراقيتي
اصيرن جف شمع لوجاني ضيف النار اشبكة وكل ضواه يطشر ابيتي
اسوي الي اكدرة ولو تشح وياي احط وية الخبز للضيف عافيتي
اطلع العوز بره وهوة رابي وياي واشتم الهوة والعب بحريتي
واتشلبه النخل ما حاجة للصاعود لو محيوك سل حزام تبليتي
هو الواجه الطلقات عين بعين يكول السل يمنع احوي تمريتي
انا معلم اشك حلك الليالي السود وصلة من الشمس ترفعهة ساريتي
وعاند دنيتي وامشي على خشم الموت تريد شلون ادنك الراس تاليتي
هذه القصيدة مهداة الى كل المسؤولين العراقيين بقلم الشاعر المبدع سالم الدراجي
الجمعة يناير 08, 2010 11:03 am
